Бишкек, Ынтымак-Ордо, 2026-жылдын 27-февралы – Кыргыз Республикасынын Министрлер Кабинетинин Төрагасы – Президентинин Администрациясынын Жетекчиси Адылбек Касымалиев Президент Садыр Жапаровдун төрагалыгы алдында өткөн республикалык кеңешмеде 2025-жылдын жыйынтыгы боюнча баяндама жасады. Адылбек Касымалиев учурдагы көрсөткүчтөр мурда белгиленген узак мөөнөттүү болжолдоолордон кыйла ашып кеткенин баса белгиледи. 

«Кыргыз Республикасын 2026-жылга чейин өнүктүрүүнүн улуттук программасына ылайык, биздин жылдык орточо экономикалык өсүш 5% деңгээлинде каралган. Бирок, чындык башка динамиканы көрсөттү: акыркы төрт жылда Кыргызстан жылдык орточо өсүү темпин 10% деңгээлинде камсыз кылууда. 2025-жылдын жыйынтыгы боюнча биз тарыхый чекке жеттик – ИДПнын көлөмү 1 триллион 976,4 миллиард сомду түздү, ал эми реалдуу өсүү темпи 11,1%ке чейин тездеди», – деп билдирди Министрлер Кабинетинин Төрагасы. 

Министрлер Кабинетинин башчысы ошондой эле мындан аркы өнүгүүнүн векторун белгиледи: 2030-жылга чейин өлкө тейлөө моделинен индустриалдык-агрардык экономикага өтүп, өндүрүштүн үлүшүн 28–30%га чейин көбөйтүшү керек. 

Баяндамада 2025-жылы 1 триллион 101,4 миллиард сомго жеткен консолидацияланган бюджетке өзгөчө көңүл бурулду. 

«Бул тарыхый деңгээл экономиканын өсүшү менен гана эмес, кирешелерди башкаруунун сапаттык жакшырышы менен да камсыздалды. Динамикага көз салыңыз: Салык кызматынын кирешеси 2020-жылга салыштырмалуу дээрлик төрт эсеге өсүп, 304,3 миллиард сомго жетти. Бажы кызматынан түшкөн кирешелер «Смарт Бажы» системаларын киргизүүнүн аркасында алты эсеге көбөйүп, 157,4 миллиард сомду түздү. Бул катуу тартиптин жана процесстерди санариптештирүүнүн натыйжасы», – деп баса белгиледи Адылбек Касымалиев.

МинКаб башчысы 2025-жылы Кыргызстан капиталды тартуунун жана санариптик финансылык активдердин жаңы куралдарын ийгиликтүү колдонгонун белгиледи. 
«Биз эл аралык финансылык мамилелердеги позициябызды бир топ чыңдадык. Биринчи жолу 700 миллион АКШ доллары өлчөмүндөгү еврооблигациялар жайгаштырылып, алар өнүктүрүүнүн стратегиялык долбоорлоруна багытталган. Мындан тышкары, алтын менен камсыздалган жана 1 долларга теңелген 50 миллион токен көлөмүндөгү «USD KG» улуттук стейблкоининин биринчи эмиссиясы болду. Ошондой эле «KG ST» улуттук стейблкоини эл аралык биржада листингден өттү, бул биздин финансылык системага болгон ишенимди тастыктайт», – деп баса белгиледи Министрлер кабинетинин башчысы. 

Адылбек Касымалиев мамлекеттик аппаратты реформалоого токтолуп, «өкмөттүк акселераторлор» программасынын жана мамлекеттик түзүмдү дебюрократташтыруунун алкагында ийгиликтүү иштер аткарылганын белгиледи. 

«Бюрократияны кыскартуу боюнча тапшырмалардын алкагында биз "Өкмөттүк акселераторлор" программасынын алкагында 100 күндүн ичинде 12 артыкчылыктуу маселени чечүүгө мүмкүндүк берген механизмдерди киргиздик. Мамлекеттик кызмат көрсөтүүлөрдүн мөөнөтү бир нече күндөн бир нече саатка чейин кыскарды. Биз 30дан ашык мыйзам долбоорун иштеп чыктык, алардын 16сы кабыл алынды. Биздин максат – мамлекетти жарандар жана бизнес үчүн мүмкүн болушунча ыңгайлуу кылуу», – деди ал. 

МинКаб башчысы бизнести жана ишкердикти колдоо алкагында 2025-жылы бизнес үчүн жеңилдетилген насыялоо, жер преференциялары, ири долбоорлор боюнча мамлекеттик кепилдиктер жана башка механизмдер киргизилгенин белгиледи. 

Адылбек Касымалиев сөзүнүн аягында командалык иштин маанилүүлүгүнө көңүл бурду.

«Мындан аркы туруктуу өнүгүү абсолюттук туруктуулукту жана Президенттик администрация менен тыгыз байланышта бардык мамлекеттик органдардын координацияланган ишин талап кылат. Бир гана күч-аракеттерди бириктирүү бизге алынган темпти сактап калууга жана 2030-жылга чейинки өлкөнү өнүктүрүүнүн улуттук программасында коюлган максаттарга жетүүгө мүмкүндүк берет», - деп сөзүн жыйынтыктады Министрлер Кабинетинин Төрагасы.